"Festung Bergen"og Hordaland
Bergen by vart ei strategisk hamn for okkupantane under heile krigen. Den viktige malm- og forsyningsskipsfarten nordover var heilt avhengig av vestlandsbyen. Jernbanesambandet til hovudstaden og god verftskapasitet var viktige element for eit Tyskland i krig. Dermed vart det ei viktig oppgåve å verne byen mellom dei sju fjella.

Rett etter det tyske angrepet mot Norge i april, vart alle dei tidlegare norske kystfestningane bemanna med tyske styrkar. Frå sommaren 1940 og fram til våren 1941 vart i tillegg to kystfort ferdigstilt og bemanna. Det var dei tidlegare norske anlegga Skjellanger (MKB 5) og Korsnes (MKB 6), som var under byggjing då landet vart okkupert i 1940.

Dei norske anlegga i Hordaland tilhøyrde før krigen Bergen befestninger indre fort (Kvarven,Hellen og Sandviken) og ytre fort (Håøy-avsnittet og Lerøy-avsnittet). Dei fleste anlegga var bygde i perioden 1898-1900, og forta var dermed relativt forelda då krigen braut ut i 1939. Frå 1942 vart det fart i utbygginga av kystfestningar her i fylket. Dette kom som følgje av ein direkte ordre frå Hitler personleg.

Hordaland kom etter kvart til å bli omkransa av nærare 32 kystfort og festningar, 14 tunge luftvernbatteri og fem flyplassar og flyhamner. Det var særleg Bergen som skulle vernast. Ingen annan by i Noreg var omgitt av eit slikt antal festningsanlegg under krigen.

Tekst Dag Bjørnar Mjelde